Siampipa leh Gupkhiatna (Lawki pan Pasian Biakna ah)

1850 kumkiim in a kisat hi dingin a ki lamen Pakzaang khua pen khangmoi nawn hetlo hinapi tuni dongciang dawibiakna a omna mun khua khat hicitciat se hi. Dawibia sanggam u leh naute vei-in lainatna tawh pawlpi tuamtuam leh kipawlna tuamtuam panin Camp a kipan Crusade veitampitak mah kibawlin lainatna khitui tampitak luang khia khin baan ah a luangluang lai ahi hi. Pasian' nasem minthang mitampitak mah in nawkin, a kipumpiak palaai tampitak mah in Pasian itna leh Zesu Khris hong gup khiatna thu sanggam dawibia lawki nu la pate' tungah genpih in khitui naptui tawh a kikuppih ngekngek ngei ahi hi.

Siampu pa leh Revd Do Khua Mang

Hih Pasian itna thu theitheilo in a sang theinailo sanggamte hangin pawlpi keem siapa Reved. Do Khua Mang zongh a lungsim om thei hetlo hi. Hih dawibia nu le pa sanggamte a veiluat lawmlawm na hangin, LAWKII CAMP khat bawl ding ngaihsutna-a neihna thu pawlpi upate tawh kithukimuh hi. Pawlpi upate in zongh vei mahmah in a mimal mahmah in zongh thu a na ngetsaksak khin uh ahih manin, hih thu a kivaihawm khakna hangin kilawp thei mahmah hi. Nidangin zongh kigeel ngei zelzel hinapi thu tuamtuam hangin tangtung zolo den hi.

Tulpi pate nupa leh Revd Do Khua Mang

Hithu ah dawibia sanggam nu le pate camp ah hong lutnopna dingun pawlpi upate ngaitmah kipia khia in dawibia inn omna munte ah va hawhin va genpih ngekgek masa uh hi. Amau pen a lungsim uh suangtum sangin khauhzaw thamlo sik khauh pente bangin a cip vilvel himawk uh ahih manin, hih ciang nangawn ngah zawh loh khak ding a kipatau mahmah ahi hi. Hih LAWKII CAMP bekbek paulam in pawlpi mi ahi thei khempeuh in sun le zan cilo Biakinn pai ngekngek in khitui luang kekeuh kawmsa in Pasian ki apap hi. Pawlpi khangno tangzang zawdeuh pawlkhat mah zongh Carmel mual ah siapa tawh pai-in, hih Camp a ding bekbek thungetna nithum sung (March 20-23,2017) kinei ngait hi.

LAWKII CAMP pen 27-31/3/2017 hunsung bawl dingin a kikhensat pen  Pasian hehpihna tawh thusia om hetlo in nuamtak in kipan thei hi. Camp hong lut nuam tuanhetlo khat le nih  a omteei hangin, a tamzaw tham hong pai-in, Pasian thu hong ngai uh ahih manin kilungdam mahmah hi.

Innpipa leh Revd Do Khua Mang

Biakinn sung mah ah Revd Do Khua Mang in giakpih cip in Pasian hong itna thu leh Zeisu hong gupkhiatna thu genpih in, thungetna tawh a sun a zanin hanciamin mapang hi. Ni nih sung vingveng Pasian thu a genpih hangin, dawibia sanggamte kilok hetlo mawk uh hi. Hih gupkhiatna thu tel theilo in  a saan theih hetlohna hangun sia pa dahmahmah ahih manin, an nelo tui dawnlo in, khitui luang kekeuh kawmsa in Pasian samin ama nawt veve hi. Tua bang mah in Pawlpi mi Pasian' thu um u le naute in zongh khitui naptui luangin thungetsakna tawh panpih ciat uh hi. Ni thum vingveng, an ne kikeuh lo in Pasian huhna ngak kawmsa in gupkhiatna thu a gen teitei leh a upna leh a lunggulhna Pasianin za in dawng  takpi mawk hi.

Suangtum sangin a khauhzaw lungsimte Pasianin na a sep takciang, patpuan sangin neemzaw thei zen hi. Lamdang hi. Zeisu hong gupkhiatna leh Pasian hong itna thu hangin, lungdam kipaak in a khitui uh luang kekek thei mawk hi. Zeisu gumpa hon pa in sangin, dawi biakna nusiat ding kensatin, kisikna leh lungdamna khitui tawh Pasian maipha zon ding khensatna nei thei zen uh hi. Hi bangin gupkhiatna thu sangthei in a kikhel theih tak uh ciang, sia pa zong a lungdam mahmah in a cihna mel ding theilo liang hi.

Haitawite nupa leh Revd Do Khua Mang

Hih Pasian' nasepna vanglian hangin a lungdamna thu i sia pa Reved Do Khua Mang in a genkikna ah, "Gupkhiatna thu sangin, tua thu hangin Lawki Siampu pa khitui tak keuhkeuh kamuh teh kalung damlua-ahih manin tualai tak kasi liuleu zong phamawh kasa kei hi." ciliang hi.

Tua bangin Zeisu honggup khiat nathu tel in a santheih takuh teh lungdam na khitui luang kawm sa in amau khensat tawmna tawh Lawki Mangpi teng Christian hong suakta uh hi.

Tuate pen,

1.Pa Zam Sian Pau (Siampu) & Innkuan

2.Pa Tuang Sian Pau (Tulpi) & Innkuan

3.Pa Thang Deih Mung (Innpi) & Innkuan

4.Pa Thang Sian Mang (Haitawi) & Innkuan

Vei tampitak a kituh khin gupkhiatna khaicite tu in hong palh in hong gah khia ahih manin lungdamna leh minthana khempeuh Topa tungah khatvei athak in ih pia hi. Mun tuamtuam a om thu-um mi a kua mapeuh in zongh  Christian hongsuak thak hih innkuan 4te  Upna zungthuk akhak semsem na dingun leh acian lai Inn 3 te ading thu nget na-ah hongphawk pihlai un cih Zeisu min tawh kong cial phapha uh hi.

Dawibiakna Vatzatte Haltumna

Gualzawh na pen Topa nangma hang ahi hi. Topa min, athan semsem na hita hen.

(I sia pa Revd Do Khua Mang zongh Pasian in hong zatsak semsem na dingin thungetsak ciat ding hihang.)

Pakzaang Tuiphum Pawlpi,

Media Department.