Awging September Nipi Masa

Pope Francis In Lungsim Lamsang Damlohna Aneihna Thu Genkhia:

Argentina-ah a omlai, kum 42 a phaklai pek in lungsim lamsang tawh kisai kaal khat khat vei a kibawl zelzel ahihna thu Pope Francis: Politics and Society cih laibu thaksungah suaksak hi. French minam Dominique Wolton (sociologist) kiangah Pope in Jewish mite lungsim lam siavuan (psychotherapist) kiangah lungsim tawh kisai a damlohna hangin va kilak zel aa, tua Jew minam lungsim lamsang siavuanpa in abawl zelzel ahihna thu a genna ah, “kha 6 sung bangh, kaal khat khat vei a inn ah manman in kapai aa, ka damlohna lungduai tak in hon bawlin hong kikuppih                                                           den hi…” ci-in gen hi. September1, 2017. USA Today.

Billy Graham in Mi Kisuamvai Hopihna Nei:

Billy Graham in Barcelona, Spain, aa mikisuam lum 14 leh a liam mi 100 valte tungtangah hopihna leh ngaihsut piakna manlangtak in neipah thei hi. Hih buaina pen Las Ramblas kiim ah a piang hi aa, asi a liam leh a mangthang mite a dingin thu a ngetsakna thu leh tua mite bang biakna bang biakna ahi zongin Zeisu mintawh it in vei-in a lung himawh na thu Billy Graham in tangko pah hi. Thamlo in Rapid Response Team-Billy Graham Evangelistic Association pahn huhna leh panpihna neipah uh hi. Video in na etnop leh hilai mek in. August 18, 2017. Christian Headline.

Sudan Palikte In Thu-Um Makaite Bawlsia:

Omdurman, Sudan aa palikte in Pasian thu-um Makai mi (7) manin, thu a sit didek khit uh ciang thongsung denna lai uh hi. Aug. 23 ni nai 6 sung vingveng thong sungah tua thu-um Makai mi sagihte khum uh hi. Gam ukna thukhun nial in Pasian thu bulphuh in mite makaih in pawl tuamtuam aneihna hang un hibangin abawl ka hi uh hi ci-in, thuneite in gen uh hi. Hih a kiman makaite sungah Rev. Ayoub Mattan, Sudanese Church of Christ (SCOC), Kwa Shamaal,                                                      head of missions at the SCOC te kiel hi. August 28, 2017. Christian                                                        Headlines.

Kay Goldsworthy In Amasa Penpen Numei Archbishop Ngah:

Roger Herft mun ah na sem dingin Australian Anglican Church in amasa penpen numei archbishop Kay Goldsworthy teel uh hi. Roger Herft pen kumcinglo nu le pa omkhopna buaina vaikhat ah thukhenna hangin, minsiatna ngah ahih manin, a tang mi dingin hih Kay a kiteel ahi hi. Kay in mipi’ a ding in nahoih leh lungmuanna ki bitphuah kik zo ding hi cih ka um hi, ci-in gen hi. August 29, 2017. Christian Today.

Muslim Innkuan Khat Ah Zawhthawh Thutawh Numeineu Khat Kikoih:

Kum 5 apha pan Christian numei neu khat, innkuan sungah thumanglo ahih manin, zawhthawh thutawh Muslim innkuan sung khatah koih mawk uh hi. Hi naupangin Arabic pau siamlo thamlo in paunuam ngiatlo ahih manin, a inn taktak ahi apite’ inn ah   puakkik ding hoih zaw ahihna thu Judge Khatun Sapnara-a kici Muslim makaai khat in thuneite kiangah gen ahih manin, zanni-in kiciahsak kik hi. August 30, 2017. Christian Today

Thu-Um Mikhat A Thunget Khawllo Ahih Manin Hurricane Harvey Tuikhangin Taaita:

Tusung a minthang vangvang buaina khat ahi Hurricane Harvey tuikhanna sungah Collette Sulcer a kici Pasian thu um nupi khat a tuikhang hanhan kawmkaal ah a thungetna khawl tuanlo in, zom teitei ahih manin, a huh ding a paite’ husa za kha manlo ahih manin sih lawh ahihna thu The New York Times ah suak hi. Amah pen Beaumont, Texas ah omin, kum 41 a pha Nurse khat zongh hi aa, Jordyn a kici a tanu kum 3 a pha pan tawh thungen in a omlaitak tui-in a khannelh ahi hi. A hi zongin, kaamphatna tawh a tanu donghu mipawlte in lap manin, zato puak man uh ahih manin, silo hi. Hih naupang tawh zato a lumkhawm kha Antionette Logan     kiangah, naupang neu in anu’ thu a genkikna ah, “ka nu in tu dong thu ngengen lai ding hi.” ci-in gen ciauciau hi. A lamdang khat ah, a nu si-in, a tanu neu suakta bilbel hi. Agust 30, 2017. The News York Times.

Tangguak Aa Om Thautawi Minih:

Irvine, California ah Pastor Greg Laurie pawlpi ahi Harvest Orange County Church ah minih tangguak in thau tawi kawmsa in lut mawk uh hi. Siatna bawl dingin kipan uh ahih manin, tua mun ah nai nih sung vingveng kibuaipih mawk hi. Hih thautawi minih te kiman khin in, Paul Vincent Vielkind, kum 34 leh Brandon Joseph Vielkind, kum 22 te hi uh hi. Aug 31, 2017. The Christian Post.

Pasian Thu-Um Mi Pawlkhat In Nashville Statement Phuang:

Gupkhiatna thu ahi Pasian hong itna thu ah Makai muanhuai micingtak mi 150 valte ii makaihna tawh Nashville Statement cih thu phuangkhiatna khat nasia tak in kinei hi. Tua thu phuangkhiatna ii lungtup bulpi pen neih kibangh kiteenna deihlohna thu siksan uh hi. Hih neih kibangh kiteenna/pumkhatna pen mawhna lian mahmah ahih baan ah Christian te hongto gamtatna khat hi ci-in phuangkhia uh hi. Hih thu phuankhiatna pen Nashville ah a keinei Southern Baptist Convention te ii Ethics and Religious Liberty Commission kumsim kimuh khopna (conference) pan hong kipan khia hi aa, Tuesday ni-in Biblical Manhood and Womanhood Council ah kikipsak khin hi. Tua Nashville Statement a simnuam ta dingin hilai mekin kisim thei hi. August 30, 2017. Christian Today.

Lady Gaga A Christian Sia Khat In Thuhilh:

Chris White a kici gupkhiatna thu tangko minthang khat pen leitung bup lasa siam minthang Lady Gaga-a dingin a nisim nuntakna-ah Pasian thu ahilh leh a zah tak mahmah a sia khat zongh ahi hi. Tua Pasian zat White in, Pasian thu thei mikhat ahi Lady Gaga kiangah mite lungsim zawhnop luatna nusia in, lungnuam tak in a om hilhial theih ding na ding thu va hilh hi. A sawtlo in Netflix ah a kikhah khia ding Lady Gaga tawh kisai "Five Foot Two" cih thulu tungtang ah a thuhilhna-ahi hi. Chris White in hih Lady Gaga pen Pasian thu sungah a thuklut mahmah ding mikhat leh Pasian zat mahmah in a piang ding mikhat ahih na thu ‘God bless America’ cih la a sakna tung tawnin kimu thei hi. Ci-in gen thuah hi. Tu in a hih leh Gaga a deih mipi tampitak in a ngaklah mahmah uh ahi “Five Foot Two” cih Neetflix documentary pen Sept. 22 ma peuh mah in kihawm khia dingin kilam enta hi. Tua ‘Five Foot Two’ video na maleep nop leh, hilai mek in. August 30, 2017. The Christian Post.

Beyoncé, A Pastorte Khat Tawh Kithuah In Mihaksate Huh:

Mikim in a kithei lasa siam kelkel khat mah ahi Beyoncé pen Rudy Rasmus a kici pastor khat tawh kithuah in Hurricane Harvey tuikhang buaina hangin haksatna a thuak mite huh in panpih ding nasep khat hong kipan khinta hi. A omna Houston kiim ah hih tuikhang hangin dongtuak mi a tultul in a lom omte huh kawikawi ding gelna nei hi. A lawmte khat ahi Lemonade in a genna ah, “Beyoncé in a lawmte honkhat tawh BeyGOOD kipawlna pan Pastor Rudy Rasmus makaihna dungzui-in, haksatna thuakte huhna piapia ta hi” ci hi. Beyoncé mahmah in zongh tua haksatna thuak mite a dingin thu ka ngen den hi, ci hi. September 1, 2017. Christian Conservative Daily.

ISIS Te In Naungek Haltum:

Mi sokdok kipawlna khat ahi Islamic State Terrorist Organization te in Hawija ah mi 8 haltum in, tua sungah naungeek nawi nelai khat zongh kihel hi. Nung kha sungin, a mau ISIS galkapte sung mahmah ah zongh mi 10 bangh a hitangin a kihal tum uh ahi hi. Ki lungkhatna leh Leitung bup lakzawhna ding lungtupna-aneihna hanguh cizen hi. Min kitheilo reporter khat in Al-Sumaria News ah hibangin thupuak hi, “Kirkuk nitumna khanglam ah migilo ISIS te khutlum tawh sih ding lau aa-a taimang mi 8 kiman hi.” Ci-in thupuak hi. August 25, 2017. Basnews English Version.

Thuneite In Biakpiak Ding Khaktan:

Egypt aa om Ezbat Al-Forn palikte in khuasung mite Sunday ni kikhop biakpiakna neih ding phallo in a khaktan ngitnget ahihna thu International Christian Concern (ICC) te in August 20 ni-in, kiciantak in na kankhia ta uh hi. Ezbat Al-Forn ah a zinpak  Phungzi Father Botros Azeez na ngawn Biakpiakna a piak ding thuneite in phallo mawk uh hi. Hi thu hangin thu-um mite kidah mahmah aa, thungetna ah phawk ding kitangsam ahihna thu ICC te in tangko uh hi. August 23, 2017. Christian Headline.